Ricunuscenza

Stanotte ‘a dint’ ‘o lietto cu’ nu strillo
aggio miso arrevuoto tutt’ ‘a casa,
mme so’ mmiso a zumpà comme a n’arillo…
E nun me faccio ancora persuaso.

Ma comme,dico io po,’cu’ tanta suonne,
i’ mme so’ ghiuto a ffa’ ‘o cchiù malamente;
sti suonne songo suonne ca te pònno
fa’ rummanné stecchito comme a niente.

I’ steve allerta ‘ncoppa a ‘na muntagna.
Tutt’a ‘nu tratto sento  ‘nu lamiento.
‘O pizzo addò stev’i’ era sulagno…
Dicette ncapo a me: E chisto è ‘o viento!

Piglio e mme mengo pe’ ‘nu canalone
e veco sott’a a n’albero piangente
‘nu fuosso chino ‘e prete a cuppolone…
e sotto a tutto steva ‘nu serpente.

– Aiuto! Aiuto – ‘O povero animale
se mettette ‘alluccà cu tutt’ ‘o sciato!
Appena mme vedette: – Menu male!…
Salvatemi! I’ mo moro asfessiato!

E chi t’ha cumbinato ‘e sta manera?
ll’addimannaje mentr’ ‘o libberavo.
-E’ stato ‘nu signore aieressera-
mme rispunnette, e ggià se repigliava.

Si nun era pe’ vvuje’ i’ ccà murevo.
facitave abbraccià, mio salvatore!
Mme s’arravoglia attuorno e s’astrigneva
ca n’atu ppoco mme schiattava ‘o core.

Lassame! – Lle dicette -‘O vvi’ ca i’ moro?
E chianu chianu mme mancava ‘a forza,
‘o core mme sbatteva…ll’uocchie ‘a fore,
mentre ‘o serpente chiù stringneva ‘a morza!

Chisto e ‘o ringraziamento ca mme faje?
Chesta è ‘a ricunuscenza ca tu puorte?
A chi t’ha fatto bbene chesto faje?
..Ca si’ cuntento quanno ‘o vide muorto!

Amico mio, serpente i’ songo nato!…
Chi nasce serpe è ‘nfamo e senza core!…
…Perciò t’aggia mangià! Ma t’he scurdato
…ca ll’ommo, spisso, fa cchiù peggio ancora?!

“Totò – Antonio de Curtis” Antonio Griffo Focas Flavio Angelo Ducas Comneno Porfirogenito Gagliardi De Curtis di Bisanzio (Napoli, 15 febbraio 1898 – Roma, 15 aprile 1967), è stato un attore, commediografo, poeta, paroliere, sceneggiatore e filantropo italiano. Viene riconosciuto come uno dei attori cinematografici e teatrali italiani più importanti di sempre, e vera maschera del cinema paragonato a grandi attori comici come Chaplin e Buster Keaton con il suo volto particolare rimase impresso nel cinema nella comicità mondiale. Fu un grande uomo anche verso la povera gente della sua città dove viene visto ancora oggi come una vera leggenda, anche come poeta e paroliere in lingua partenopea. Il 15 febbraio del 1898 nasceva a Napoli, Totò da  Giuseppe de Curtis e Anna Clemente. Muore il 15 aprile del 1967 a Roma.

Totò con Peppino